İrandakı uran hara “yoxa çıxıb”?

İrandakı uran hara “yoxa çıxıb”? | VİDEO

12:35 23 İyun 2025 Oxunub:848

İsrail ordusunun (ÇAXAL) mətbuat xidməti Hərbi Hava qüvvələrinə (HHQ) məxsus 15 qırıcısının ölkənin hava kəşfiyyat agentliyinin məlumatlarına əsasən, İranın qərbindəki Kirmanşah bölgəsindəki hərbi hədəflərə zərbələr endirdiyini açıqlayıb.

AzVision.az xəbər verir ki, ÇAXAL-ın mətbuat xidmətinin məlumatına görə, nəticədə İranın İsrail ərazisinə yönəlmiş bir neçə raket buraxılış qurğusu və yer-yer raketləri üçün anbar yerləri məhv edilib.

“Bununla belə, ABŞ prezidenti Donald Trampın administrasiyası ölkə rəhbərinin İranın nüvə proqramının “tamamilə məhv edilməsi” ilə bağlı bəyanatına baxmayaraq, nüvə silahının əsas komponenti olan zənginləşdirilmiş uranın taleyinə aydınlıq gətirə bilmir”, - “The New York Times (NYT)” yazır.

Amerikalı məmurların hesablamalarına görə, İranda 10-a qədər nüvə başlığı yaratmağa kifayət edəcək uran ehtiyatı var.

Denni Danon : “İsrailin İranda hələ işləri çoxdur” | VİDEO

Peyk görüntüləri dağın içərisində tikilmiş Fordo obyektinə ciddi ziyan dəydiyini göstərir. Ona 30 tonluq nüfuzedici bombalar atılıb. Bununla belə, İsrail kəşfiyyatının məlumatına əsasən, Tehran bəzi avadanlıqları və demək olar ki, silah səviyyəsinə çatdırılmış 60%-ə qədər zənginləşdirilmiş 400 kiloqrama yaxın uranı oradan çıxara bilib.

Beynəlxalq Atom Agentliyi (MAQATE) İranda uranla bağlı son yoxlamalarının zərbələrdən bir həftə əvvəl aparıldığını bildirib. Qurumun baş katibi Rafael Qrossi sözügedən uranın İsfahandan köçürüldüyünü açıqlayıb. O, həmçinin nüvə obyektlərinə hücumların qəbuledilməz olduğunu və radioaktiv tullantıların ciddi fəsadlarla nəticələnə biləcəyini vurğulayıb.

Rusiya prezidenti Vladimir Putinlə danışıqlar aparmaq üçün Moskvaya gələn İranın Xarici İşlər naziri Abbas Əraqçi, öz növbəsində, bildirib ki, ABŞ-nin İranın nüvə obyektlərinə hücumu nüvə silahlarının yayılmaması rejimini sarsıdır və beynəlxalq təhlükəsizliyə zərbə vuraraq Nüvə Silahlarının Yayılmaması Müqaviləsi (NSYM) effektivliyini şübhə altına alır.

Xatırladaq ki, bu xəbərlər fonunda İsrailin BMT-dəki daimi nümayəndəsi Denni Danon İranda hələ də vurulmalı çoxlu hədəflərin qaldığını bəyan edib.